NORTH MIZORAM DISTRICT PYD CHANCHIN

A hmasain North Mizoram District PYD ten kum 60 (1961-2021) hmel kan hmu thei hi a lawmawm hle mai. Harsatna leh buaina karah pawh kan hma a hruaitu kal hmasaten zum leh hriam karah PYD hamsawnna atan theihtawp an lo chhuah hi fakawm kan ti a, zahna chibai kan buk a ni. Kohhranin hun harsa tak tak kan tawh karah tha leh zung sengtu te avanga kum 60 hmel hmu thei kan ni hi lawmawm kan ti a. N.Mizoram District PYD hruaitu leh member lo ni tawh zawng zawng te zahna chibai kan buk hmasa che u a ni. Kohhran thalai pawl din anih hnu hian mumal taka thil kalpui nghal a harsat avang leh ziaka thil vawn that thlap hmuh tur a tam tawk loh avangin thil chhuilet a harsa hle mai a. Kan record hmuh theih ang ang atanga kan chhuiletna te kan han tarlang mai dawn a ni. District PYD hi mumal taka din anih hma hian Bial leh local lam te chu din a lo ni ve tawh a. Kan chhui theih thuk berah chuan N.Mizoram District PYD hi 4th march 1961 a din niin kan ngai a, General Conference vawi 11-na minute a kan hmuh angin 4th march, 1961 hi PYD din ni atan kan pawm ta ni. Thalai pawl chanchin hmasa lam (International) : United Pentecostal Church kum 1945 September ni 25-a din anih khan thalai pawl din turin hmalak ve nghal a ni a, hemi atan hian hmalatu tur committee fimkhur taka din a ni a. he committee hian pawl hming leh pawl thiltum te buaipuiin hun leh tha tam tak sengin hna an thawk a. Tichuan, kum 1946 September thla a UPC khawmpui lian General Conference chuan thalai pawl din chu pawmpuiin a hming atan “Pentecostal Conquerors” tih chu an hmang tan ta a ni. Hetia thalai pawl din anih takah chuan thalaite an phur hle a, Thalai pawl thuchhuahna tur Conqueror Thread (Chanchinbu ni tura ngaih a ni) te siam in Thalai pawl hla tur te siam fel thlap a ni. Tunlai ang deuhin Logo te pawh buatsaih a ni leh zel a. Kansan District Pentecostal Conquerors President RE Nichils chuan phaw lemah hawrawp P leh C Kraws in dai danin logo tur a duang a, More than Conquerors (Hnehtu aia ropui zawk) tih a chuang nghe nghe a ni Thalai pawl chanchin hmasa lam (Mizoram) : Zoramah Kristian Thalai Pawl (Presbyterian & Baptist) din anih khan thlarau harhna leh rawngbawlna vaw dai thei turin ngaihtuahna an seng a, khawthlang nun zia mil in Tonic Solfa nena enkawlin Solfa zai chu ngaihsan an in zirtir a. Biak ina sang tak taka khuang khat a zai te leh Solfa thiam ngaihsan chu thalaite rilruah an tuh a, thalaiten changkang ta riauvin an in hre ta bawk a ni. Hengte hi thlarau lam harhna leh taksa chetna lam te vuak daihna hmanrua berah an hmang ta nghe nghe a ni. Thalai pawl a ding ta : Hetiang taka Solfa zai tih lar anih takah leh thlarau lam in epna a lo awm takah chuan Pentecost mi hmasa/nu leh pa te chuan thalai pawl din ve chu an ngaihsak vak ta lova. Thlarau lam aia solfa te buaipui/uar a, Presbyterian note an nih an hlauh vang a ni. Thlarau hnathawh dal thei chi reng reng chu Pentecost nu leh pa te chuan an hnualsuat leh do ve avangin thalai pawl din tul tih lohna a awm a ni. Mahse, a tulna in a nang a ni chek ang a, UPC din atanga Kum 11na March 4 1961 ah thalai pawl din chu General Conference ah an ti tlu ta a ni. In epna karah leh nu leh paten support chiah lo mahse thalaite zingah rualawhna a awm tlat si avangin hmun thenkhatah kohhran thalai chu din chhoh ve a ni ta a. Khawiah nge a din hmasak bera, engtin nge hma a sawn zel tih hi chhui leh hriat a harsa tawh khawp mai a, rambuai (1966) hmalamah hian a ding rihlo tia sawi a tam a ni. Amaherawhchu, N.Hlimen Bial chuan Kolasib-ah thalai Bial khawmpui 1958 khan kan nei tiin R.Tawnluia LcH Vairengte chuan a sawi a, Zohmun Bial pawhin 1960 hmalam khan an nei ve bawk a ni awm e. Headquarters Local PYD te chuan an chanchin chhuiin 1958 khan an ding ngei niin an hria a, 2018 khan Diamond Jubilee an lawm nghe nghe. Bial leh Local hrang hrangah PYD hi a ding hma hlawm hle a, mahse District huap hian kan nei har deuh a ni mai zawk awm e